Rain crops on Wheat: ਕਣਕ ਅਤੇ ਹਾੜ੍ਹੀ ਦੀਆਂ ਹੋਰ ਪ੍ਰਮੁੱਖ ਫਸਲਾਂ ’ਤੇ ਪਿਛਲੇ ਦਿਨੀਂ ਪਏ ਮੀਂਹ ਦੇ ਅਸਰ ਦੀ ਤੁਰਤ ਕੋਈ ਖਬਰ ਨਹੀਂ ਹੈ ਅਤੇ ਵਾਢੀ ਜ਼ੋਰਾਂ ’ਤੇ ਹੈ। ਖੇਤੀਬਾੜੀ ਮੰਤਰਾਲੇ ਦੇ ਸੀਨੀਅਰ ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿਤੀ।
ਭਾਰਤੀ ਮੌਸਮ ਵਿਭਾਗ (ਆਈ.ਐਮ.ਡੀ.) ਨੇ ਭਵਿੱਖਬਾਣੀ ਕੀਤੀ ਹੈ ਕਿ ਤਾਜ਼ਾ ਪਛਮੀ ਗੜਬੜੀ ਕਾਰਨ ਕਈ ਸੂਬਿਆਂ ’ਚ ਮੀਂਹ ਅਤੇ ਗੜੇਮਾਰੀ ਜਾਰੀ ਰਹੇਗੀ। ਮੌਸਮ ਵਿਭਾਗ ਅਨੁਸਾਰ, 18-21 ਅਪ੍ਰੈਲ ਦੇ ਦੌਰਾਨ ਉੱਤਰ-ਪਛਮੀ ਭਾਰਤ ’ਚ ਇਕ ਤਾਜ਼ਾ ਪਛਮੀ ਗੜਬੜੀ ਦੇ ਪ੍ਰਭਾਵਤ ਹੋਣ ਦੀ ਸੰਭਾਵਨਾ ਹੈ ਅਤੇ ਪੂਰਬੀ ਬਿਹਾਰ, ਉੱਤਰ-ਪੂਰਬੀ ਅਸਾਮ, ਰਾਇਲਸੀਮਾ ਅਤੇ ਦਖਣੀ ਤਾਮਿਲਨਾਡੂ ’ਚ ਬਣੇ ਚੱਕਰਵਾਤੀ ਚੱਕਰਵਾਤ ਕਾਰਨ ਵੱਖ-ਵੱਖ ਥਾਵਾਂ ’ਤੇ ਭਾਰੀ ਮੀਂਹ, ਤੂਫਾਨ ਅਤੇ ਬਿਜਲੀ ਡਿੱਗਣ ਦਾ ਖਤਰਾ ਵੀ ਹੈ।
ਉਨ੍ਹਾਂ ਕਿਹਾ ਕਿ ਪੰਜਾਬ ਅਤੇ ਹਰਿਆਣਾ ’ਚ ਕਣਕ ਦੀ ਵਾਢੀ ਹਾਲੇ ਸ਼ੁਰੂ ਹੋਈ ਹੈ। ਉਨ੍ਹਾਂ ਕਿਹਾ, ‘‘ਇਕ ਹਫਤੇ ਦੇ ਅੰਦਰ ਇਨ੍ਹਾਂ ਦੋਹਾਂ ਸੂਬਿਆਂ ’ਚ ਕਣਕ ਦੀ 95 ਫੀ ਸਦੀ ਫਸਲ ਦੀ ਕਟਾਈ ਹੋ ਜਾਵੇਗੀ। ਵਾਢੀ ਤੇਜ਼ੀ ਨਾਲ ਕੀਤੀ ਜਾਂਦੀ ਹੈ ਕਿਉਂਕਿ ਕਿਸਾਨ ਕੰਬਾਈਨ ਕਟਾਈ ਮਸ਼ੀਨਾਂ ਦੀ ਵਰਤੋਂ ਕਰਦੇ ਹਨ। ਇਸ ਲਈ ਅਸੀਂ ਬਹੁਤ ਬਿਹਤਰ ਸਥਿਤੀ ’ਚ ਹਾਂ।’’
ਆਈ.ਸੀ.ਏ.ਆਰ.-ਆਈ.ਆਈ.ਡਬਲਯੂ.ਬੀ.ਆਰ. ਦੇ ਡਾਇਰੈਕਟਰ ਨੇ ਅੱਗੇ ਕਿਹਾ ਕਿ ਉਤਪਾਦਕਤਾ ਦਾ ਪੱਧਰ ਕਾਫ਼ੀ ਚੰਗਾ ਹੈ, ਜਿਸ ਨਾਲ ਫਸਲੀ ਸਾਲ 2023-24 (ਜੁਲਾਈ-ਜੂਨ) ’ਚ 114 ਮਿਲੀਅਨ ਟਨ ਕਣਕ ਦਾ ਰੀਕਾਰਡ ਉਤਪਾਦਨ ਹੋਇਆ ਹੈ। ਇਸ ਸਾਲ ਕੁਲ 34.15 ਮਿਲੀਅਨ ਹੈਕਟੇਅਰ ਰਕਬੇ ’ਚੋਂ 15 ਫ਼ੀ ਸਦੀ ਰਕਬੇ ’ਚ ਬੀਜੀ ਗਈ ਕਣਕ ਦੀ ਫਸਲ ਇਕ ਹਫ਼ਤੇ ਦੇ ਸਮੇਂ ’ਚ ਵਾਢੀ ਲਈ ਤਿਆਰ ਹੋ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਇਹ ਫਸਲ ਚੰਗੀ ਤਰ੍ਹਾਂ ਪੱਕ ਗਈ ਹੈ।
